موجودہ حکومت سائنس اینڈ ٹیکنالوجی تے توجہ ڈیسی،نینگراں کیتے سائنس اینڈ ٹیکنالوجی دے میدان اچ مزید موقع بنڑائے ویسن، وزیر اعظم عمران خان دا نسٹ یونیورسٹی اچ تقریب نال خطاب

اسلام آباد ۔09 دسمبر(اے پی پی) وزیر اعظم عمران خان آکھیے جو موجودہ حکومت سائنس اینڈ ٹیکنالوجی تے ودھ ساری توجہ ڈیسی ، یونیورسٹیاں اچ سائنس اینڈ ٹیکنالوجی پارک بنڑسن ، پاکستان کوں علم تے مبنی معیشت اچ بدالیا ویسی ، نینگراں کیتے سائنس اینڈ ٹیکنالوجی دے میدان اچ مزید موقع بنڑائے ویسن ، چیلنج زندگی اچ اگوں ودھنڑ دا رستہ ڈیندن ،بادشاہت دے نظام پاروں مسلمان پچھوں رہ گن ،جمہوریت اچ خاندانی سیاست دی گنجائش کائنی میرٹ دی بنیاد تے لوک اتے آندن تے لیڈر دی وی احتساب تھیندے ۔اے گال انہاں سنوار کوں نسٹ یونیوسٹی اچ تقریب نال خطاب کریندے ہوئیں آکھی اے ایں موقع تے پاک فوج دے سربراہ جنرل قمر جاوید باجوہ، نسٹ دے ریکٹر لیفٹیننٹ جنرل نوید، وفاقی وزیر سائنس اینڈٹیکنالوجی فواد چوہدری وی موجود ہن ۔وزیراعظم آکھیا جو میں پہلی واری نسٹ اچ آیا میکوں اندازہ کائناں ہئی جو اتھاں اتنا زبردست کم تھیندا پئے ۔ انہاں یونیورسٹی اچ بہترین تعلیمی ماحول اتے سہولتاں تے یونیورسٹی انتظامیہ کوں خراج تحسین پیش کیتا۔ وزیر اعظم آکھیا جو ہر چنگاں کم ہک وژن توںشروع تھیندے ۔ اللہ تعالیٰ انسان کوں اشرف المخلوقات بنڑائے تے اینکوں بہوں طاقت ڈتی اے ۔انہاں آکھیے جو 60 دی دہائی اچ پاکستان ہک زبردست دور توں گزریا ہئی ۔ پاکستانی قوم اچ امید، جذبہ اتے اعتماد ہئی تے اساں تکھے ترقی دے پاسے ٹردے پئے ہاسے ۔ ولا او دور آیا جڈاں قوم اچ خود اعتمادی تے خود انحصاری مک گئی جڈاں کوئی قوم ایں کیفیت دا شکار تھیندی اے تاں ڈوجھیں دی محتاج تھی ویندی اے ۔انہاں آکھیا جڈاں میںپہلی واری بھارت گیا اتھاں اساں نال ایجھا سلوک کیتا گیا جیویں اساں کہیں وڈے ملک توں آیوں ۔ بھارتیاں اچ احساس کمتری ہئی جڈاں جو اساں ڈے ا عتماد ہئی ۔ انہاں آکھیا جو ایندی وجہ اے ہئی جو پاکستان اچ میرٹ دی پالیسی دا کلچر ہئی ۔بیورو کریسی دنیا دی بہترین بیورو کریسی ہئی ۔ میرٹ دی بنیاد تے لوک اتے آندے ہن ،اساڈے ادارے مضبوط ہن ،ایں دور اچ پاکستان اچ وڈے وڈے منصوبے شروع تھئے لیکن میرٹ دا نظام خراب تھیا تاں پاکستان اپنڑی صلاحیت اچ اتوں تلے آگیا ۔ وزیراعظم نسٹ دے طالب علماں کوں یاد ڈیوایا جو او ملک دی ساریں توں اعلیٰ یونیورسٹیاں اچ تعلیم حاصل کریندے پن ایں لحاظ نال انہاں اتے ذمے واری وی وڈی ہوندی اے ۔ انہاں آکھیا جو بد قسمتی نال تعلیم ، معیار تعلیم اتے خواندگی دے میدان اچ اساں پچھوں رہ گیوں ۔ وزیر اعظم نسٹ اچ سائنس اینڈ ٹیکنالوجی پارک دے قیام کوں بہوں وڈی پیشرفت قرار ڈیندے ہوئیں آکھیا جو ڈوجھیاں یونیورسٹیاں اچ ایجھے ہی ٹیکنالوجی پارک بنڑائے ویسن۔ انہاں آکھیے جوانسان جیرھا وی خواب ڈیکھدے انہاں دی تعبیر ممکن اے ۔ اللہ تعالیٰ انسان کوں بہوں صلاحیت ڈتی اے لیکن انسانی اوں وقت کامیابی حاصل کریندے جڈاں اپنڑی ذات توں ودھ تے سوچیندے ۔ انہاں طالبیں کوں آکھیا جو اگر او کامیابی تے زندگی اچ کجھ کرنڑ چاہندن تواں ہمیشہ اپنڑے دل دی سنڑن ،جنون صرف دل اچ ہوندے۔ وزیراعظم آکھیا جو موجودہ حکومت سائنس اینڈ ٹیکنالوجی تے خصوصی توجہ ڈیندی پئی اے تے معاشی حالات بہتر تھیونڑ دے نال نال اعلیٰ تعلیم، مستقبل دی ٹیکنالوجیز، ڈرون ٹیکنالوجیز تے مزید توجہ ڈیسوں تے نینگراں کیتے کوں مزید موقع ڈیسوںتے انہاں کوں نئی ٹیکنالوجی سکھیسوں ۔ وزیراعظم تعلیم تے خصوصی توجہ ڈیونڑ تے پاک فوج دے سربراہ جنرل قمر جاوید باجوہ کوں وی خراج تحسین پیش کیتا۔