ثابت تھی گے جڈاں وی ملک تے اوکھا وقت آئے ساریاں سیاسی جماعتاں کٹھیاں تھی ویندن ، سیاسی امور تے اختلاف رائے جمہوریت دا حسن اے، ڈاکٹر فردوس عاشق اعوان

اسلام آباد ۔ 7 جنوری (اے پی پی) وزیراعظم دی معاون خصوصی اطلاعات و نشریات ڈاکٹر فردوس عاشق اعوان آرمی ایکٹ اچ ترمیم دا بل قومی اسمبلی توں منظور تھیونڑ تے ساریاں سیاسی جماعتاں کوں خراج تحسین پیش کریندے ہوئیں آکھیے جو ملکی تحفظ نال جڑی اہم قانون سازی تے سیاسی جماعتاں اتفاق اتے برد باری دا مظاہرہ کیتے، اج ثابت تھی گے جو ملک تے جڈاں وی اوکھا ویلھا آسی ساریاں سیاسی جماعتاں ہک مٹھ تھی ویندن ،سیاسی امور تے اختلاف رائے جمہوریت دا حسن اے ،جڈاں وی ملک دی قومی سلامتی اتے مفاد دی گال آندی اے تاں ساریاں سیاسی جماعتاں رلے ہوندن،پیپلز پارٹی خصوصی تحسین دی حقدار اے جیں قومی مفاد اچ اپنڑی تجویز واپس گھدی ، مخالفین سنڑ گھنن جو ملکی مفاد دے معاملے اچ ساریاں سیاسی جماعتاں ہک مٹھ ہن ،پارلمنٹ عوام دی عدالت اچ سرخرو تھیندی رہسی ،پاکستان دے مخالفین دے پروپیگنڈے کوں پارلیمنٹ دفن کرڈتا ، پارلیمنٹ انہاں دا ارماناں کوں ملیا میٹ کرڈتے ۔او منگل کوں پارلیمنٹ ہاﺅس دے باہر سینٹ دی قائمہ کمیٹی اطلاعات و نشریات دے چیئرمین سینیٹر فیصل جاوید دے رلے میڈیا نال گال مہاڑ کریندیاں پیاں ہن ۔ ڈاکٹر فردوس عاشق آکھیا جو اج پاکستان دی پارلیمان دے اندر اہم قانون سازی تے سیاسی جماعتاں برد باری ڈکھائی ، جیرھی جو ایں گال دی عکاسی کریندی جڈاں تئیں کوئی چیلنج سامنڑے آندے تاں ساریاں سیاسی جماعتاں تے قیادت سیاسی مفادات توں باہر نکل تے قومی مفاد کوں ترجیح ڈیندن ، سیاست دے محاذ تے اختلاف رائے رکھنڑ جمہوریت دا حسن اے ، سیاسی جماعتاں ہک ڈوجھے تے تنقید کریندیاں رہندن جڈاں پاکستان دی گال آندی اے تاں سارا کجھ چھوڑ تے پاکستان نال رل ویندن ۔اج متفقہ قانون سازی دا تاریخ ساز ڈینھ ہئی ، پاکستان دے مخالفین اکھ کھول تے ڈیکھ گھنن، اے یکجیتی پارلیمنٹ توں نظر آندی رہ ویسی ۔ایں یکجہتی دی فضا کوں اگوں ودھنڑاں چاہیدے ،عوام دے ڈکھیں دا مداوا تھیوے ، اے مشکلات دے خاتمے دا سال اے ،ایندے نال عمل کوں ریلیف ملسی ،پارلیمنٹ عوام دی عدالت اچ سرخرو تھیندی رہسی ۔ڈاکٹرفردوس عاشق اعوان آکھیے جو پاکستان دا جیرھا ایں وقت باہرلے محاذ تے قومی سلامتی دے چیلنج دا سامنڑاں اے ، پاکستان دے مخالفین ایف اے ٹی ایف دے اندر کیا سازشاں کریندے پن ،انہاں آکھیے اداریں توں کرپشن مکاونڑ وی قومی سلامتی دا اہم جزو اے ،کرپشن مکاونڑ کیتے ایجنڈے دے مطابق ادارے اپنڑاں کم کریندے رہ ویسن ۔انہاں آکھیا جو قائمہ کمیٹیاں اچ ساریاں جماعتاں دی نمائندگی ہوندی اے ،اپوزیشن مستقبل اچ وی اپنڑی تجویز گھن آوے او قوم دے مفاد اچ ہوئی تاں حکومت انہاں ترمہم کوں منظور کریسی ۔ فردوس عاشق اعوان آکھیا جو احتساب ملک تے قوم دی ضرورت اے ، اگر کہیں کجھ غلط کائنی کیتا تاں اونکوں گھبراونڑ دی ضرورت کائنی اداریں کوں کم کرنڑاں اے ۔ ایں وقع تے پاکستان تحریک انصاف دے رہنماءفیصل جاوید خان آکھیے جو چنگی گال اے جو اتفاق رائے نال بل پاس تھئے ۔کجھ ایجھی قانون سازی ہوندی اے جیں کوں لمبا کیتا ویندے ، زینب الرٹ بل کمیٹی اچ پھسیا ہویا ہئی جیں کوں چار مہینے بعد پارلیمنٹ اچ بھیجا گے ۔